Uşaqlarda qulaq ağrısı valideynlərin ən çox narahat olduğu hallardan biridir. Körpə və ya məktəbli yaşında olmasından asılı olmayaraq, uşaq qulaq ağrısı zamanı əsəbi olur, yuxusu pozulur və iştahı azalır. Bəzən səbəb sadə soyuqlama olsa da, bəzi hallarda daha ciddi qulaq və ya boğaz problemlərinin xəbərçisi ola bilər. Ona görə də valideynlər uşaqlarda qulaq ağrısının səbəblərini, əlamətlərini və müalicə yollarını bilməlidirlər. Sağlam Ailə Tibb Mərkəzi olaraq bu yazımızda sizə mövzu ilə bağlı ən vacib məqamları izah edirik.
Uşaqlarda Qulaq Ağrısının Səbəbləri
Qulaq ağrısının təkcə qulağın özündə yaranan problem olduğunu düşünmək olmaz. Çox vaxt qulaq, boğaz, burun və hətta diş problemləri bir-biri ilə bağlıdır.
Orta qulaq iltihabı (otit media) – uşaqlarda ən çox rast gəlinən səbəbdir. Soyuqdəymə və burun tutulması nəticəsində qulaqda maye toplanaraq iltihaba səbəb olur.
- Kükürd tıxacı – qulaq yolunda artıq kükürd toplananda həm ağrı, həm də eşitmə zəifliyi müşahidə oluna bilər.
- Soyuqdəymə və qrip – burun tutulması qulaqda təzyiqi artıraraq ağrıya səbəb ola bilər.
- Boğaz və badamcıq iltihabı – boğazdakı iltihab qulağa vuraraq ağrıya yol açır.
- Diş çıxarma prosesi – xüsusilə körpə uşaqlarda diş çıxararkən yaranan ağrı qulağa vuraraq valideynləri çaşdıra bilər.
- Qulağa yad cismin düşməsi – uşaqlar bəzən oyun zamanı kiçik əşyaları qulaqlarına sala bilirlər və bu, həm ağrıya, həm də infeksiyaya səbəb ola bilər.
Uşaqlarda Qulaq Ağrısı Əlamətləri
Uşaqlarda qulaq ağrısını anlamaq bəzən çətin ola bilər, çünki kiçik uşaqlar özlərini düzgün ifadə edə bilmirlər. Valideynlərin diqqətli olması və uşağın davranışlarını müşahidə etməsi çox vacibdir. Qulaq ağrısı adətən uşağın gündəlik davranışına və əhvalına birbaşa təsir göstərir.
Ən çox rast gəlinən əlamətlər isə bunlardır:
- Uşağın qulağını tez-tez tutması və dartması;
- Gecələr narahat olması, tez-tez oyanması və yuxusuzluq;
- İştahanın azalması, yeməkdən imtina etməsi;
- Qulaqdan şəffaf və ya irinli axıntı gəlməsi;
- Yüksək hərarət və halsızlıq;
- Diqqətinin yayınması və əsəbilik.
Xüsusilə körpə uşaqlarda qulaq ağrısı zamanı ağlama artar və uşaq sakitləşməkdə çətinlik çək bilər. Böyüklərdə isə qulaqda təzyiq hissi və zəif eşitmə də müşahidə oluna bilər. Bu əlamətlər valideynlər üçün xəbərdarlıq siqnalıdır və uşağın həkimə göstərilməsi vacibdir.
Uşaqlarda Qulaq Ağrısının Müalicəsi
Müalicə səbəbdən asılı olaraq dəyişir. Hər uşağa eyni üsul tətbiq etmək olmaz. Sağlam Ailə Tibb Mərkəzində qulaq ağrısı şikayəti ilə müraciət edən uşaqlar mütəxəssislər tərəfindən müayinə olunur və uyğun müalicə təyin edilir.
Valideynlər bilməlidirlər ki, özbaşına dərman vermək və ya qulaq damcısı istifadə etmək uşağa zərər verə bilər. Hər bir müalicə yalnız həkim nəzarətində aparılmalıdır.