Kalprotektin leykositlərdə istehsal olunub, miqdarı bağısaqlara daxil olan leykositlərlə düz mütənasib olan proteindir. Tibbi praktikada xəstənin nəcisindəki kalprotektin miqdarının təyini, klinik əlamətlərlə birlikdə, iltihablı bağırsaq xəstəliklərinin diaqnostikası üçün istifadə olunur.

Laktoferrin dəmiri özünə birləşdirə bilən,  zərərli bakteriyalara qarşı təsirli olan və nəcisdə aşkar olunan bir proteindir. Göz yaşı, tüpürcək və ana südü kimi müxtəlif bədən mayelərində olur.

İmmun sisteminin müəyyən ağ qan hüceyrələrinin tərkibində xüsusi ilə çox miqdarda laktoferrin vardır. Müdafiə reaksiyası zamanı bu immun hüceyrələr laktoferrini ifraz edir. Daha sonra laktoferrin bakteriyaların yaşaması üçün lazım olan dəmiri götürərək zərərli bakteriyalarla mübarizə aparmağa kömək edir.

Nəcisdə laktoferrin dəyərinin artması  bağırsaqda iltihab olduğunu göstərir. İltihab olduqda, ağ qan hüceyrələri mümkün patogenlərlə mübarizə aparmaq üçün bağırsaqlara daxil olur. Laktoferrin bu müdafiə hüceyrələri tərəfindən bağırsaqlara ifraz olunur və bu, nəcisdə laktoferrin dəyərini artırır.

Laktoferrində artım müəyyən bir xəstəliyə aid edilə bilməz. Laktoferrinin dəyəri həm aktiv infeksiyalar, həm də xroniki bağırsaq iltihabı zamanı artır. Buna görə də, laktoferrin bağırsaqda iltihab üçün qeyri-spesifik marker adlanır.